போலாமா on ஸுபா

முதல் பக்கம்

Mon, 01 Jan 0001 00:00:00 +0000

போலாமா?

குறும் புதினம்

பயண அனுபவங்களின் அடிப்படையில்.

© ஆசிரியர்: ஸுபா

இதில் வரும் விஷயங்களை நாங்கள் தீவிர ஆராய்ச்சி செய்து எழுதியுள்ளோம் என்று நீங்கள் நினைத்தால் அதற்கு நாங்கள் பொறுப்பல்ல!

“அப்பா அப்பா, நாம ஒரு நாய் குட்டி வைச்சுக்கலாமா?” என்று எங்க பசங்க பல வருடங்களாக நச்சரிச்சபோதும், எங்களோட ஒரே பதில், “உங்களை வளர்ப்பதே பெரிய பாடு. அதில் நாய் வேறயா” என்ற இத்து போன டயலாக் தான். அப்படி இருந்த நாங்க, பத்மாவின் அம்மா வீட்டில் ‘ரஸ்டி’ என்றொரு அழகான நாயின் வரவால், எந்த அளவுக்கு மாறினோம் என்பதை நினைத்து எங்களுக்கே ஆச்சரியம். நாய்களிடம் இருந்து கற்றுக் கொள்ள வேண்டியது நிறைய இருக்கிறது. எப்படி வாழ்க்கையை இருக்கும் தருணத்தில் அனுபவிப்பது, எதிர்பார்ப்புகளற்ற அன்பை எப்படிக் கொடுப்பது ..அப்பப்பா இந்த ஜீவன்களைப் படைத்ததும் மனிதனைப் படைத்ததும் ஒருவன் (அ) ஒருத்தி தானா என்று நினைக்கத் தோன்றுகிறது. “நாயே” என்பது வசவு சொல் அல்ல, அது ஒரு வாழ்த்து!

முன்னுரை

Mon, 01 Jan 0001 00:00:00 +0000

முன்னுரை

மாற்றம் ஒன்றுதான் நிலையானது!

எங்கள் இருவருடைய கடவுள் நம்பிக்கை வழக்கத்தினால் மட்டுமே வந்ததும் அல்ல, செய்யாமல் விட்டால் “சாமி கண்ணை குத்திடுமோ” என்ற அச்சமுமில்லை. காலப்போக்கில் எங்கள் அனுபவங்களால் உருவானது. நாளையே இதுவும் மாற வாய்ப்புள்ளது!

எங்கள் அனுபவங்களைத் தொகுத்து ஒரு பயணக் கட்டுரை எழுதலாம் என்று முடிவு செய்தோம்.

முதலில் நான் பயணக் கட்டுரை எழுதலாம் என்று யோசிக்க ஆரம்பித்தபோது, என் மனசுல நிறைய கேள்விகள். எந்த பாஷையில் எழுதலாம், யார் டார்கெட் ஆடியன்ஸ் என்றெல்லாம் சிந்தனைகள். நான் படித்தது தமிழ் மீடியம் பள்ளியில்தான் என்றாலும், கல்லூரியிலிருந்து ஆங்கில வழிக் கல்விதான். ஆங்கிலத்தில் எழுதினால் ‘ரீச்’ நிச்சயமாகப் பெரிதுதான். ஆனாலும் தமிழில் எழுத ஆசையாக இருந்ததாலும், நம்முடைய சிந்தனைகள் எல்லாம் நம் தாய்மொழியில் நன்றாக வெளிப்படும் என்று தோன்றியதாலும், தமிழில் எழுதத் தொடங்கிவிட்டேன்.

பிரயாணம் ஆரம்பம்

Mon, 01 Jan 0001 00:00:00 +0000

பிரயாணம் ஆரம்பம்

பத்மாவும் நானும் “தனியாக” குஷியாக மாயவரம் பயணம் புறப்பட்டோம். இருவரும் சேர்ந்து கோயில் கோயிலாகச் செல்லும் சாக்கில் - நெஜமா சொல்லணும்னா - ஊர் ஊராச் சுத்தலாம், கொஞ்சம் ‘ஷாப்பிங்’ செய்யலாம், ‘ப்ளஸ்’, பத்மாவிற்கு கோயில் சிற்பங்கள் மீது ஒரு நியூ ஃபவுண்ட் லவ் ‘கிரேஸ்’ கொஞ்ச நாளாக. ஒரே கல்லில் இரண்டு, இல்லை, நிறைய மாங்காய்கள்; பசங்களுக்கும் ஒரு ‘பிரேக்’, எங்களிடமிருந்து! முக்கியமா திருநள்ளார் கோயில் போக என்னிடம் யாரோ சொல்லியிருந்தார்கள். எனக்கு வேளாங்கண்ணியும் நாகூர் தர்காவும் ‘விசிட்’ பண்ண ரொம்ப நாட்களாகவே ஆசை. இன்னும் சின்ன ஆசை: அஜ்மீர் தர்காவும், சேவண் ஷெரீப் லால் ஷாபாஸ் கலந்தரும். முதலாவதே கொஞ்சம் அதிகம். இரண்டாவது பாகிஸ்தானில் உள்ளது. பார்க்கலாம், வாய்ப்பு வருகிறதா என்று!சென்னையில் இருக்கும் வேளாங்கண்ணி கோயிலுக்கும் மும்பையில் இருக்கும் ஹாஜி அலி தர்காவுக்கும் நிறைய முறை சென்றிருக்கிறேன்.

திருமீயச்சூர்

Mon, 01 Jan 0001 00:00:00 +0000

திருமீயச்சூர்

ஸ்வாமி - மேகநாத ஸ்வாமி. அம்பாள் - லலிதாம்பிகை.

“ஸ்ரீ சக்ர ராஜ சிம்ஹாசனேஸ்வரி ஸ்ரீ லலிதாம்பிகையே” என்ற மகாராஜபுரம் சந்தானத்தின் குரலில் ஒலித்த இந்தப் பாடல் நினைவுக்கு வருகிறது. ஸ்ரீசக்கரத்தின் மேல் கம்பீரமாக உட்கார்ந்து இருக்கும் லலிதாம்பிகை.

நாவுக்கரசரால் பாடப்பட்ட ஸ்தலம்:

“தோற்றுங் கோயிலுந் தோன்றிய இருந்திருப்போமோ கோயிலும்
வேற்றுக் கோயில் பலவுள மீயச்சூர்க்
கூற்றம் பாய்ந்த குளிர்புன் சடையரற்
கேற்றங் கோயில்கண் டீரிளங் கோயிலே.”

“பொன்னம் கொன்றையும் பூவணி மாலையும்
பின்னும் செஞ்சடை மேல் பிறை சூடிற்று
மின்னு மேகலையாளொடு மீயச்சூர்
இன்ன நாள் அகலார் இளங்கோயிலே”

இந்த வரிகளின் மூலம் இந்தக் கோயிலின் சிறப்பையும், அந்த அம்பாளின் அழகின் வர்ணனையையும் நாம் அறிகிறோம்.

திருவாரூர்

Mon, 01 Jan 0001 00:00:00 +0000

திருவாரூர்

ஸ்வாமி - தியாகராஜர். அம்பாள் - நீலோத்பலாம்பிகை.

அடுத்து சென்றது திருவாரூர். சங்கீத மும்மூர்த்திகள் மூவரும் பிறந்த ஊர். என்ன ஒரு ‘ம்யூசிகல் ஹெரிடேஜ்’! ‘ஷேக்ஸ்பியர்’ பிறந்த ஊரான ‘ஸ்ட்ராடபோர்ட்-அபான்-ஏவோன்’ என்ற இடத்திற்கான ‘வெப்சைட்டை ’ பாருங்கள். எப்படி அதை கொண்டாடுகிறார்கள் என்று. அது மட்டும் அல்ல; அதனால் வரும் ‘எகனாமிக்’ benefits ஐயும் நினைத்துப் பாருங்கள். திருவாரூரை ஏன் நாம் அந்த மாதிரி கொண்டாடுவதில்லை என்ற வருத்தம் மேலோங்கி இருக்கிறது. மும்மூர்த்திகளில் ஒருவரான முத்துஸ்வாமி தீக்‌ஷிதர் பெரிய கீர்த்தனைகளை இந்த கோயிலின் அம்பாள் கமலாம்பாள் பெயரில் ‘கம்போஸ்’ பண்ணி இருக்கார். அந்த நவா வர்ண கீர்தனைகள் ஒரு வெஸ்டர்ன் சிம்பொனிக்கு ஈடானவை. ஒரு கொசுறு செய்தி: வாதாபி கணபதி என்கிற பிரபல கீர்த்தனை, இந்த கோவிலிலுள்ள வாதாபி கணபதியைப் புகழ்ந்து பாடியது ஆகும்.

நெகபடாம்

Mon, 01 Jan 0001 00:00:00 +0000

நெகபடாம்

ஸ்வாமி - காயாரோஹணஸ்வாமி . அம்பாள் - நீலாயதாக்ஷி.

நெகபடாம் என்று வெள்ளையர்கள் ஆட்சி காலத்தில் அழைக்கப்பட்ட நாகப்பட்டினம்.

அழகான கடற்கரை, குட்டி மீனவத் துறைமுகம் கொண்ட ஊர். நகரமும் இல்லாமல் கிராமமும் இல்லாமல், இரண்டுங்கெட்டான் இடம். மல்லிப்பூவும் கருவாடும் சேர்ந்து மணம் வீசுகிறது. ரசிப்பதற்கு ஒவ்வொன்றும் ஓர் ஈர்க்கும் வாசம். “மனம் இருந்தால் மார்க்கபந்து”, கமல் சொன்ன மாதிரி! நாகப்பட்டினம் என்ற பெயரே, ஆதிசேஷன் சிவனை வழிபட்டதால் வந்தது என்ற ஒரு வரலாறு உண்டு.

ஆழ்வார் பாசுரமும், துஆவும் ஒலிபெருக்கிகளில்! கபீர் சொல்லியிருப்பது தேவையில்லாமல் ஞாபகத்திற்கு வருகிறது: “கடவுள் என்ன காது கேட்காதவரா, ஏனிந்த வெளிப்பாடும் சத்தமும்?”

நாகப்பட்டினம்

Mon, 01 Jan 0001 00:00:00 +0000

நாகப்பட்டினம்

பெருமாள் - சௌந்தரராஜ பெருமாள். தாயார் - சௌந்தரவல்லி.

“சௌந்தர ராஜம் அஷ்ராயே கஜ ப்ருந்தாவன சாரங்கா வருட ராஜம்
நந்தா நந்தன ராஜம் நாகப்பட்டன ராஜம் சுந்தரி ராமராஜம் சுரவினுட மஹி ராஜம்.”*

“நான் யானைகளின் காட்டில் ‘கஜேந்திரனை’ காத்தருளிய சௌந்தரராஜனிடத்தில் தஞ்சமடைகிறேன். அவரே வரங்களை அள்ளி வழங்குவதில் ராஜா. சௌந்தரராஜன், நந்தனின் அருமை மகன்; நாகப்பட்டினத்தை ஆள்பவன்; அழகிய லக்ஷ்மியின் கணவன்; தேவலோகத்தினரால் புகழப்பட்டவன். அவனே இந்த பிரபஞ்சத்தை ஆள்பவன்.”

பிரிந்தாவன சாரங்கனைப் போற்றும் முத்துசாமி தீக்ஷிதர் இயற்றிய இந்தப் பாடல், அதே பெயருள்ள ராகத்தில் அமைக்கப்பட்டிருக்கிறது.

மிகவும் அழகான மற்றும் கம்பீரமான பெருமாள் கோயில். பட்டாச்சார்யார் மிகவும் ஸ்ரத்தையோடு ஸ்தல வரலாறு கூறினார். எங்களை “கீழே குனிஞ்சு பாதத்தை சேவிச்சுக்குங்கோ” என்று கூறினார். எந்த அளவுக்கு அவருக்கு தான் இருக்கும் இடத்திலும், செய்யும் வேலையிலும் ஈடுபாடு என்பது அவர் மெனக்கெடும் விதத்திலேயே கண்கூடாகத் தெரிந்தது. கோயிலுக்குச் செல்வது என்பது என்னைப் பொறுத்தவரையில் ஒரு வேண்டுதல் என்ற கட்டாயத்திற்காகவோ, புண்ணியத்தை அள்ளிக் கொள்வதற்காகவோ அல்ல; பிறகு என்ன என்று யோசித்தால் அதில் ஏதோ சொல்லத் தெரியாத ஒன்று; ஒரு கனெக்ட் - சில இடங்களில் அதை உணர்ந்தோம் - அந்த பட்டாச்சாரியார் சொன்ன விதத்தில் ஏதோ உண்மையான உணர்வுகள்; தன்னால் இயன்ற அளவில், தன் கோயிலுக்கு வருபவர்களுக்கு ஒரு தெய்வீக உணர்ச்சியை கொடுக்க genuine ஆக முயன்றது போல் இருந்தது. நாலாயிர திவ்யப் பிரபந்தத்தில் இந்தக் கோயிலைப் பற்றி விவரமாகக் கூறப்பட்டிருக்கிறது. தென்கலை ஐயங்கார் கோயில் என்பதால் தமிழ் மணம் கமழ்கிறது.

வேளாங்கண்ணி

Mon, 01 Jan 0001 00:00:00 +0000

வேளாங்கண்ணி

‘பாசிலிக்கா ஆஃப் அவர் லேடி ஆஃப் குட் ஹெல்த்’.

கடலோரத்தில் அமைந்திருக்கும் ரோமன் கத்தோலிக்க கோயில். வேளாங்கண்ணி என்பது “வேலை” என்கிற ஊரின் கன்னிப்பெண் என்று பொருள் கூறுகின்றனர். மூன்று அற்புதங்கள் நிகழ்ந்த பிறகு இந்தக் கோயில் நிறுவப்பட்டது. இன்னமும், இந்தக் கோயிலுக்குச் சென்றால், அற்புதங்கள் பற்றி நிறைய பேசுகின்றனர்.

வெள்ளை வெளேர் என்ற பளிச் கோபுரம், புதிதாக சலவை செய்தது போல்! கட்டிடத்தின் நவீனமும் நேர்த்தியும் நம்மை வெகுவாகக் கவர்கின்றன. வருஷம் இரண்டாயிரத்து நாலில் ஏற்பட்ட ‘சுனாமி’யினால் மிகவும் பாதிப்படைந்த இடம் வேளாங்கண்ணி என்று நினைவுக்கு வரும்போது மனதில் ஒரு பெரிய அழுத்தம். அலை மோதும் கூட்டம்; எங்கே பார்த்தாலும் மக்கள் வெள்ளம்; சுற்றிலும் சிறிய பெரிய கடைகள்; உணவகங்கள்; பல தரப்பட்ட மக்கள்; தென்னை நாற்றுகளுடன், தூக்க மாட்டாமல் தூக்கிக்கொண்டு, கையில் குழந்தை, சாமான்களுடன் இங்கும் அங்கும் ஓடிக்கொண்டிருந்தவர்கள்.

நாகூர்

Mon, 01 Jan 0001 00:00:00 +0000

நாகூர் - தர்கா

நாகூர் ஷாஹுல் ஹமீது என்கிற ‘சூஃபி’ துறவி.

சுமாரான கூட்டம், நிறைய கடைகள், பளபள துணி, வாசனை ஊதுபத்திகள் என்று பரபரப்பான விற்பனை; ஒலிபெருக்கியில் தமிழ் இஸ்லாமியப் பாடல்கள் என்று ஒரு கலவை.

“யாரும் வருவார் யாரும் தொழுவார் நாகூர் ஆண்டவர் சன்னதியில், நானும் ஒன்று நீயும் ஒன்று நபிகள் நாயகம் முன்னிலையில்”

என்ற மு. க. முத்துவின் பாட்டு நினைவுக்கு வருகிறது.

இந்த ஊர்காரரான நாகூர் ஹனிபாவின் ‘கணீர்’ குரலில்,

“இறைவனிடம் கையேந்துங்கள் ….”

என்கிற அவருடைய பாட்டு காதில் ஒலித்து கொண்டே இருக்கிறது.

நாகூர் ஷாஹுல் ஹமீது என்கிற ‘சூஃபி’ துறவியின் கல்லறையின் மீது கட்டப்பட்டிருக்கும் தர்கா. இந்தத் தர்காவைக் கட்ட இந்துக்கள் அதிக அளவில் பங்களித்தார்கள் என்பது வரலாறு. இங்கிருக்கும் ஐந்து ஸ்தூபிகளில் மிகப் பெரியதை தஞ்சாவூர் பிரதாப் சிங் என்கிற மராட்டிய அரசர் கட்டினார் என்பது விசேஷம். வேளாங்கண்ணியைப் போலவே இங்கும் இந்துக்கள் அதிக அளவில் வருகிறார்கள். இங்கு நடக்கும் ‘கந்தூரி’ என்கிற விழாவில் இந்து மரபைப் பின்பற்றி நாதஸ்வரம் வாசிக்கிறார்கள். தர்காவின் உட்புறத்தில் பெண்கள் செல்ல அனுமதி இல்லை.

திருக்கடையூர்

Mon, 01 Jan 0001 00:00:00 +0000

திருக்கடையூர்

ஸ்வாமி - அம்ருதகடேஸ்வரர். அம்பாள் - அபிராமி.

“விழிக்கே அருளுண்டு அபிராமவல்லிக்கு வேதம் சொன்ன
வழிக்கே வழிபட நெஞ்சுண்டு எமக்கு அவ்வழிகிடக்கப்
பழிக்கே சுழன்றுவெம் பாவங்களே செய்து பாழ்நரகக்
குழிக்கே அழுந்தும் கயவர்தம் மோடென்ன கூட்டினியே?"

“எனக்கு மனம் இருக்கிறது, அவளை, வேதங்களில் சொல்லி இருக்கிறபடி வழிபடுவதற்கு என்னிடம் அந்த ராஜ பாதை இருக்கும்போது, நான் எதற்குப் பாவம் செய்து, பாழாய்ப்போன நரகக் குழியில் விழ வேண்டும்?”

இந்தக் கோயிலின் வரலாற்றைப் பார்ப்போம்:

அபிராமி அந்தாதி என்கிற இலக்கிய பொக்கிஷத்தைப் பற்றி சற்று தெரிந்து கொள்வோம். இதை இயற்றியவர் அபிராம பட்டர். அவரது இயற் பெயர் - சுப்ரமண்ய ஐயர். இவர் திருக்கடையூர் கோயிலில் குருக்களாக இருந்தார். மற்றவர்கள் இவரைப் “பித்து பிடித்தவர்” என்று சொல்லுமளவளுக்கு அம்பாளின் மேல் ஆழ்ந்த பக்தியும் அளவில்லாத நம்பிக்கையும் கொண்டிருந்தார்.

திருநள்ளார்

Mon, 01 Jan 0001 00:00:00 +0000

திருநள்ளார்

ஸ்வாமி - தர்பாரண்யேஸ்வரர். அம்பாள் - பிராணாம்பிகை.

காரைக்காலில் உள்ளது, பாண்டிச்சேரி அரசாங்கத்தின் கட்டுப்பாட்டில் இருக்கிறது. ஜோதிடம் பார்ப்பவர்களின் favourite இடமாக ஆகிவிட்டது. ஒன்றுமே தெரியாதவர்கள்கூட ‘எதுக்கும் இருக்கட்டுமே’ என்று ஒரு விசிட் அடித்து விடுகிறார்கள்.

சனி தோஷம் தீர இந்தக் கோயிலுக்கு வருகை தருகிறார்கள். நளனை சனி தோஷம் ஆட்டுவித்த போது இந்தக் கோயிலில் வழிபட்டு, அதனிலிருந்து விடுதலை பெற்றார் என்பது வரலாறு.

ஒரு ராஜா ஓர் இடையனை இந்தக் கோயிலுக்குத் தினமும் பால் கொடுக்கச் சொல்லி உத்தரவிட்டாராம். அந்த இடையனும் தவறாது பால் கொடுத்து கொண்டிருந்தபோது, அந்த ஊர்த்தலைவர், அதில் தலையிட்டு, அந்தப் பாலை கோயிலுக்குக் கொடுக்காமல், தனக்கே கொடுக்கச் சொல்லி தொந்தரவு செய்தாராம். பிறகு, அந்தக் கோயில் அர்ச்சகர்கள் அரசரிடம் “பால் தினமும் வரவில்லை” என்று புகார் செய்த போது, அந்த இடையன், ஊர்த்தலைவர் பேரில் இருந்த பயத்தால், ஒன்றும் சொல்லாமல் விட்டார். அதனால் கோபமடைந்த அரசர், அந்த இடையனைச் “சிரச்சேதம்” செய்ய உத்தரவிட்டார். அந்த உத்தரவை நிறைவேற்ற எத்தனித்தபோது, சிவபெருமான் தன்னுடைய திரிசூலத்தால் அந்த இடையனைக் காப்பாற்றினார் என்பது வரலாறு.

மாயவரம்

Mon, 01 Jan 0001 00:00:00 +0000

மாயவரம் மறுபடியும்

ஸ்வாமி - மயூரநாதர். அம்பாள் - அபயாம்பிகை.

மீண்டும் மாயவரம் வந்து சேர்ந்தோம்.

மாயவரம் அல்லது மாயூரம் என்பது ஆங்கிலேயர்கள் வைத்த பெயர் என்று நினைக்கிறேன். டின்னெவெலி , த்ரிசினோபோலி, திரிஞ்சிக்கனம் (திருக்கழுக்குன்றம்) என்றெல்லாம் ஆங்கிலேயர்கள் வாயில் நுழைந்த, கடித்து குதறப்பட்ட பல்வேறு இடங்களின் பெயர்கள். அந்த ஊர்களுக்கெல்லாம் ஆங்கிலேய பெயர்களை நீக்கி விட்டு நம்மூர் பெயர்கள் வைத்ததுபோல், மாயவரத்திற்கும் இப்பொழுது மயிலாடுதுறை என்று பெயர்.

திருஞானசம்பந்தரால் பாடல் பெற்ற ஸ்தலம். இந்தக் கோயில் காசிக்குச் சமம் என்று கருதப்படுகிறது. பார்வதி “ஒரு முறை பெண் மயிலாகக் கடவது” என்று சிவனால் சபிக்கப்பட்டார். பிறகு, அவர் மைலாப்பூரிலும், மாயவரத்திலும் சிவனை வணங்கி, சாப விமோசனம் பெற்று அபயாம்பாள் ஆகக் காட்சி தருகிறார்.

தேரழுந்தூர்

Mon, 01 Jan 0001 00:00:00 +0000

தேரழுந்தூர்

பெருமாள் - தேவாதி ராஜா. தாயார் - செங்கமலவல்லி.

தேரழுந்திய ஊர் மருவி இந்தப் பெயர். பத்மா இதைப் பற்றி எங்கோ படித்திருந்ததால், சாயங்காலம் நேரம் ஆன பொழுதிலும், தொணதொணவென்று உயிரை எடுத்து இந்தக் கோயிலைத் தேடிப் பிடித்தாள். வடகலை ஐயங்கார் கோயில். விஸ்வரூப கிருஷ்ணன் சிற்பம் மிகப் பிரமாதம். சாதாரணமாக கிருஷ்ணனை குழந்தை பருவத்திலும், ஆலிலை கிருஷ்ணனாகவும் நிறைய பார்ப்போம். இது மிக வித்யாசமான ஆனந்தமான அனுபவம். கிருஷ்ணனைச் சூழ்ந்து கொண்டு நிறைய ஆடு மாடுகள். இந்தக் கோயிலைப் பற்றியும் நிறைய கதைகள் உள்ளன. எதை வேண்டுமானாலும் எடுத்துக் கொள்ளலாம்.

உபரிச்சர வாசு, ஓர் அரசன், நிறைய தவம் செய்து, பிரம்மாவிடம் தேரில் பறக்கும் சக்தியைப் பெற்றான். ஒரு முறை இந்த இடத்தின் மேலே பறந்து கொண்டிருந்தபோது, பறந்து கொண்டிருந்த தேர், தண்ணீரில் விழுந்து விட்டது. அதனால் அந்த தண்ணீர் தெறிக்கப்பட்டு, அருகில் தவம் செய்து கொண்டிருந்த அகஸ்திய முனிவர்க்குத் தொந்தரவு ஆகிப் போனது. தேர் அழுந்தியதால், அந்த ஊர் “தேரழுந்தியூர்” என்று ஆனது.

கும்பேஸ்வரர்

Mon, 01 Jan 0001 00:00:00 +0000

கும்பேஸ்வரர்

ஸ்வாமி - ஆதி கும்பேஸ்வரர். அம்பாள் - மங்களாம்பிகை.

கும்பகோணம் ஊர் பெயருக்குக் காரணமான கோயில். பன்னிரண்டு வருஷங்களுக்கு ஒரு முறை கும்பகோணத்தில் இருக்கும் மகாமக குளத்திற்கு மவுசு வரும். இதைத் தென்னகத்தின் ‘கும்பமேளா’ என்றழைக்கலாம். மகாமக குளத்தில் நிறைய கிணறுகள் உள்ளன. ஒவ்வொரு கிணற்றுக்கும் பின்னால் ஒரு கதை, நம்பிக்கை. எல்லா புண்ணிய நதிகளும் இங்கு ஒன்று சேர்கின்றன என்று நம்புகிறார்கள். ஒரு காலத்தில் உண்மையாக இருந்திருக்குமோ என்னவோ, இப்போதெல்லாம், இந்தக் குளத்தில் மகாமக சமயத்தில் இருப்பது லாரியில் கொண்டு வந்து கொட்டப்படும் மெட்ரோ வாட்டர்தான்.

‘சண்டே’ காலை; இன்னும் அவ்வளவாக ஊர் விழித்துக் கொள்ளவில்லை. சோம்பல் முறித்து எழலாமா வேண்டாமா என்று யோசித்துக் கொண்டிருந்ததோ என்னவோ! ஆரவாரம் இல்லாத தெருக்களில் நடப்பதும் ஒரு சின்னக் குஷி. இதுவா அவ்வளவு அமர்க்களத்துடன் நேற்று இருந்தது? இன்றோ ஆடி அடங்கி ஓய்வெடுப்பது போன்ற தோற்றம். ஒரு நல்ல ‘பிரேக்ஃபாஸ்ட்’ எங்குக் கிடைக்கும் என்று யோசித்துக் கொண்டிருந்தபோது, அங்கே இரண்டு பேர் நல்ல அரட்டையில் இருந்ததைக் கண்டு, “சரியானவர்கள்” என்று யூகித்து விசாரித்தோம். அவர்கள் நேராக மங்களாம்பிகைக் கோயிலுக்கு வழி சொன்னார்கள். இது என்னடா என்று யோசித்தபோது, “முதலில் அம்பாளைப் பார்த்துவிட்டு, பின் கோயிலில் இருக்கும் அதே பெயரில் நடக்கும் ஓட்டலுக்குப் போகுமாறு” சொன்னார்கள். “மங்களாம்பிகை கஃபே” கோயில் வளாகத்திற்குள்ளேயே கனஜோராக நடக்கிறது. டிஃபன், சாப்பாடு (குறிப்பாக ரசம்) பிரமாதம். ஏனைய ஹோட்டல்களில் வெங்கடரமணா, ஆடுதுறை சீதாராம் ஆகியவைகளில் எப்பொழுதுமே ஏக கூட்டம், நல்ல சாப்பாடு கிடைப்பதினால்.

சுவாமிமலை

Mon, 01 Jan 0001 00:00:00 +0000

சுவாமிமலை

சுவாமிநாதசுவாமி.

ஆறுபடை வீடுகளில் ஒன்று. முருகன் குரு ஸ்தானத்தில் இருந்து சிவனுக்கு ‘ஓம்’ என்கிற பிரணவ மந்திரம் உபதேசம் செய்வதினால், முருகனின் சன்னதி மேலே; ஸ்வாமி மற்றும் அம்பாள் சன்னதி கீழே. அதனாலேயே, ”சிவனுக்கு வாத்தியார்" என்கிற அர்த்தத்தில், சுவாமிநாதசுவாமி என்று பெயர். இங்கு முருகனின் வாகனம் யானை, மயில் அல்ல.

பத்மாவுக்கு எங்கோ படித்தது ஞாபகம் வந்திருந்து குருக்களிடம் கேட்டாள் “சிவனின் இடுப்பில் அமர்ந்து முருகன் சிவனின் காதில் உபதேசம் செய்வதாகச் சிற்பம் எங்கிருக்கிறது?” என்று. குருக்களும் வெளியே படி இறங்கும் இடத்தில் இருப்பதாகக் கூறினார். சென்று பார்த்தோம். மிகவும் அழகான சிற்பம். வெறும் மூலஸ்தானத்தை மட்டும் பார்த்துவிட்டு வராமல், இதையும் கண்டிப்பாகப் பாருங்கள்.

திருப்புள்ளமங்கை

Mon, 01 Jan 0001 00:00:00 +0000

திருப்புள்ளமங்கை

ஸ்வாமி - பிரம்மபுரீஸ்வரர். அம்பாள் - அல்லியங்கோதை அம்மை.

இந்தக் கோயிலைப் பற்றி நிறைய பேருக்குத் தெரிந்திருக்கவில்லை. பத்மாவின் உந்துதலால், இந்தக் கோயிலை நீண்ட சிரமத்திற்குப் பிறகும், டாக்ஸி டிரைவரின் அலுப்புக்கு இடையிலும் எப்படியோ கண்டுபிடித்தோம். பத்மா ஒருமுறை ‘டாக்டர் சித்ரா மாதவன்’ என்கிற பிரபல வரலாற்றாசிரியர் நடத்திய பயிற்சி முகாமில் கலந்துகொண்டபோது, இதைப் பற்றிக் கேள்விப்பட்டிருக்கிறாள். திருஞானசம்பந்தர் 7 ஆம் நூற்றாண்டில் இத்தலத்தைப் பற்றிப் பாடியுள்ளார் என்றும் அறிகிறோம்.

“பாலுந்துறு திரளாயின பரமன்பிர மன்தான்
போலுந்திற லவர்வாழ்தரு பொழில்சூழ்புள மங்கைக்
காலன்திற லறச்சாடிய கடவுள்ளிடங் கருதில்
ஆலந்துறை தொழுவார்தமை யடையாவினை தானே.
பொந்தின்னிடைத் தேனூறிய பொழில்சூழ்புள மங்கை
அந்தண்புனல் வருகாவிரி யாலந்துறை யானைக்
கந்தம்மலி கமழ்காழியுள் கலைஞானசம் பந்தன்
சந்தம்மலி பாடல்சொலி ஆடத்தவ மாமே.”

மதுரைவீரன்

Mon, 01 Jan 0001 00:00:00 +0000

மதுரைவீரன்

ஸ்வாமி - மதுரைவீரன். துணைவியர்கள் - பொம்மி & வெள்ளையம்மாள்

தஞ்சாவூரில் உள்ள அய்யம்பேட்டை கீழ வழுத்தூர் என் தந்தை பிறந்த ஊர். கீழ என்று இங்கு சொல்வது கிழக்கைக் குறிக்கிறது. மேற்கு பக்கம் இருக்கும் வழுத்தூரை மேல வழுத்தூர் என்று சொல்கிறார்கள். ‘தில்லு முல்லு’ சினிமாவில் வரும் “அய்யம்பேட்டை அறிவுடை நம்பி கலியபெருமாள் சந்திரன்” என்கிற கேரக்டர் ஞாபகத்திற்கு வருகிறதா? எனிஹௌ எனக்குத் தனி ஈர்ப்பு.

நாங்கள் குலதெய்வமாக வழிபடும் “மதுரைவீரன்”, மனிதராகப் பிறந்து, தான் செய்த நல்ல செய்கைகளினாலே, கடவுளாக வழிபடப்பட்டாரோ என்று தோன்றுகிறது. இவர், சங்கிலிக்கருப்பன், அய்யனார் ஆகியோர் எல்லோருமே இதே மாதிரி தெய்வங்கள்தான். கிரேக்க சமூகத்தில் ஹெர்குலஸ், அகிலஸ் போன்றவர்களை போல - demi gods!

நாச்சியார்கோயில்

Mon, 01 Jan 0001 00:00:00 +0000

நாச்சியார் கோயில்

தாயார் - வஞ்சுளவல்லி நாச்சியார். பெருமாள் - நறையூர் நம்பி.

இந்தக் கோயிலில் தாயார் பெயர் முதலில், அப்புறம்தான் பெருமாள் பெயர்!

திருமங்கை ஆழ்வாருக்கு விஷ்ணுவால் ‘பஞ்ச ஸம்ஸ்காரம்’ எனப்படும் மதத் துவக்கம் செய்வித்த இடம். இங்கிருக்கும் கல் கருடர், வெளியில் எடுத்துச் செல்லும்போது அதனுடைய எடை பல மடங்கு கூடும் என்பது நம்பிக்கை. இன்னொரு தென்கலை ஐயங்கார் கோயில், ஆகவே நிறைய தமிழ் மணம். நாங்கள் சென்ற பொழுது நடை சாத்தும் நேரம் ஆகிவிட்டது. நாங்கள் வெகு தொலைவிலிருந்து வருகிறோம் என்பதை எப்படியோ உணர்ந்த பட்டாச்சார்யார், எங்களை அழைத்துப் பெருமாள் தரிசனம் காண வைத்தார். இங்கும் அவர் ஸ்தல புராணம் சொல்லி எங்களை மகிழ்வித்தார். கருடரை முதலில் நால்வர்தான் தூக்கி வருவார்கள். வெளியே வர வர, எப்படி நால்வர் தூக்கி வரும் கருடரைத் தூக்குவதற்கு, முறையே 8, 16, 32, 64, 128 பேர் தேவைப்படுகிறார்கள் என்று நாம் முன்பே கேள்விப்பட்டிருந்ததை மிக அழகாக விளக்கிச் சொன்னார். திரும்பவும் சன்னதிக்கு வரும்போது, ஆட்கள் குறைந்துகொண்டே வருவார்கள். மீண்டும் சன்னதிக்குள் செல்கையில், வெறும் நான்கு பேர்தான் தேவைப்படுவார்களாம். எப்படி சாத்தியம் என்று புரியவில்லை. ஆனால், கேட்பதற்கு ஆச்சரியமாக இருக்கிறது!

சாரங்கபாணி

Mon, 01 Jan 0001 00:00:00 +0000

சாரங்கபாணி கோயில்

உற்சவர்- சாரங்கபாணி, மூலவர் - ஆராவமுதன். தாயார் - கோமளவல்லி

கும்பகோணத்திற்கு உள்ளேயே இருக்கும் கோயில். பெருமாள் சன்னதி ஒரு பெரிய தேரில் அமைந்திருக்கிறது. குதிரைகளும் யானைகளும் வேலைப்பாடு நிறைந்த கல் தேரை இழுக்கின்றன. முன்னங்கால்கள் மடித்து, அதனுடைய வால் மேல்நோக்கிய அமைப்பு, அது ஓடிக்கொண்டிருப்பது போல் தோன்றியது! சோழர் காலச் சிற்பிகளின் கைவண்ணத்தை வியக்காமல் இருக்க முடியவில்லை.

ஒரு தீவிர பக்தர், உற்றார் உறவினர் யாருமின்றி, இந்தக் கோயிலிலேயே பெருமாள் சேவை செய்துகொண்டு, ஒரு தீபாவளி அன்று இறந்துவிட்டாராம். சுற்றியிருந்தவர்கள் எல்லோரும், “இந்த நல்ல நாளில் தீட்டு படுவதா? பிறகு பார்த்துக்கொள்ளலாம்” என்று அவரவர் வேலையைக் கவனிக்க எத்தனித்தார்களாம். அப்போது ஆராவமுதனே, ஒரு சிறுவன் வடிவில் வந்து, அந்த இறந்த பக்தருக்கு ஈமக் கிரியை செய்தார் என்பது வரலாறு. ஆகவே, இன்றும் தீபாவளி அன்று இந்தக் கோயிலில் தெவசம் செய்கிறார்கள். இது வேறு எந்தக் கோயிலிலும் கிடையாது என்று அறிகிறோம்.

சோமேஸ்வரர் & சக்ரபாணி

Mon, 01 Jan 0001 00:00:00 +0000

சோமேஸ்வரர் கோயில்

ஸ்வாமி - சோமேஸ்வரர். அம்பாள் - சோமசுந்தரி.

சாரங்கபாணி கோயிலின் உட்புறத்திலேயே உள்ளது. இந்தச் சிவன் கோயிலில் திருமணம் ஆவதற்குக் காத்திருப்பதற்காக, பெருமாள் தங்கினார் என்ற நம்பிக்கை உண்டு. அருகில் உள்ள தெருக்களில் நிறைய மாடுகள் ‘ஹாயாக’ மேய்ந்து கொண்டிருந்தன.

கோயிலுக்குப் பக்கத்திலேயே கடை வீதி. ஒரு பையன் பிரமாதமான வெற்றிலை விற்றுக் கொண்டிருந்தான். நல்ல ‘கமர்’ வெற்றிலை வாசனைக் கிறக்கத்தில், கொஞ்சம் வெற்றிலைச் சீவல் ஊருக்கு எடுத்துச் செல்ல வாங்கினோம்.

சக்ரபாணி கோயில்

பெருமாள் - சக்ரபாணி. தாயார் - விஜயவல்லி.

சிவனைப் போல் இங்குள்ள பெருமாளுக்கு நெற்றியில் மூன்றாவது கண். சுதர்சன சக்கர விஷ்ணு கோயில். அரியும் சிவனும் ஒன்று என்று உணர்த்துவதற்காகத்தான் இவ்வாறு உள்ளனவோ?

ஹோம் ஸ்வீட் ஹோம்

Mon, 01 Jan 0001 00:00:00 +0000

‘ஹோம் ஸ்வீட் ஹோம்’

இந்தக் குறுகிய காலச் சுற்றுப் பயணம் முடிந்து ஊர் திரும்பினோம். மீண்டும் பஸ்ஸில் பயணம். ஆனால் இந்த முறை குளிர் சாதனம் இருந்த ‘பஸ்’. சௌகரியமான படுக்கை வசதி கொண்ட வாகனம்.

‘ஜம்’ என்று கண்ணயர்ந்து மீண்டும் விழித்துக் கொண்ட போது, சென்னை கோயம்பேடு வந்தாகி விட்டது.

இனிமேல் பிரயாணம் என்றால் இந்த மாதிரி பஸ்ஸில் அல்லது “ப்ளெஷரில்” தான் என்று மனதிற்குள் நினைத்துக் கொண்டோம்.

‘உபெர்’ பிடித்து வீடு வந்து சேர்ந்தோம்.

நாங்கள் இருப்பதோ ‘தரையும் கூரையும் நமக்கு சொந்தமில்லாத’ அபார்ட்மெண்டில் தான். எங்கள் வீடு இது போல் இருந்திருக்கலாம் என்று கற்பனை செய்ததன் வினை!

முடிவுரை

Mon, 01 Jan 0001 00:00:00 +0000

முடிவுரை

மாயவரம் மற்றும் அதற்கு அருகாமையிலும் இன்னும் நிறைய கோயில்கள் உள்ளன. ஏறக்குறைய எல்லா கோயில்களும் பழம்பெருமை வாய்ந்தவை, வரலாறு முக்கியத்துவம் உடையவை. ஆனாலும் ஒரு சித்தர் சொல்லியது மனதிற்குள் தோன்றிக் கொண்டே இருந்தது. “கோவிலாவதேடா, குளங்களாவதேடா, கோவிலும் மனத்துள்ளே, குளங்களும் மனத்துள்ளே". கடவுள் எங்கும் இருக்கிறார் என்றால், எதற்காக ஒரு குறிப்பிட்ட இடத்திற்குச் சென்று வழி பட வேண்டும்?

கபீர் கூறியதாவது, “கடவுள், மூர்த்தியில் இல்லை, தீர்த்த யாத்திரையில் இல்லை. கோயிலில் இல்லை மசூதியில் இல்லை. நமக்கு உள்ளேயே, மிக அருகாமையில் இருக்கிறார். நம்மிடமே தேடுங்கள், கடவுள் மிக எளிதாகக் கிடைப்பார்”.

நம்மில் அநேகர் கடவுளை வணங்குவது, ஒன்று சொர்கத்தை எதிர்ப்பார்த்து அல்லது நரகத்திலிருந்து தப்புவதற்கு. எதையுமே எதிர்பாராமல் கடவுள் மேலுள்ள அன்பினால் மட்டுமே வழிபடுவது என்பது எத்தனை பேரால் முடியும்? முன்னே சொன்ன சுஃபி துறவி ‘ரபீஆ அல் பாஸ்ரா’ - எதையும் எதிர்பாராமல் கடவுளை வழிபட்டார் என்று சரித்திரம் கூறுகிறது. கர்ணன் தானம் கொடுத்தது, “தனக்கு புண்ணியம் மற்றும் அதன் பலன்கள் நிறைய கிடைக்கும்” என்று நினைத்ததால் அல்ல. அதனால்தான் அவனால் தனக்குக் கிடைத்த புண்ணியத்தையே தானமாகக் கொடுக்க முடிந்தது இல்லையா?